Уждун тыронэн ӝеганъёс медаз луэ

Кун Кенешлэн Тӧроез Владимир Невоструев но Следствиея комитетэн кивалтӥсь Владимир Никешкин калыкен пумиськон ортчытӥзы. Пӧртэм пумо ужпумъёс ӝутӥськизы. Укмыс мурт вазиськиз, уждун дыраз уг басьто шуыса. Ваньзы соос «Уралэлектромонтаж» предприятиын ужало. Уждун, пе, кӧня ке толэзь уг басьто ни, предприятилэн тыронъёсыз котькудзылы ог 80-100 сюрс манетэн люкаськемын. Владимир Никешкин пусйиз, Следствиея комитет югдурез син азяз возёз, ужрадъёс кутоз, тыронъёссэ предприятие мед пытсалоз шуыса.
Кун Кенешлэн Тӧроез Владимир Невоструев верамъя, уждун тыронэз республика чакласа возе. «Зэмзэ но, та учыръя тыро-пыдо эскеронъёс нуоно, Ужъя но миграция политикая министерство но, мукет структураос но отчы мед пыриськозы», - пусйиз элькун парламентлэн кивалтӥсез.
Калыкен пумиськон кӧня ке час ӵоже кыстӥськиз. Котькуд вазиськисьлы валэктонъёс сётэмын, ӝожтӥськонъёсъя эскеронъёс матысь дыре ортчозы.