Буре ваён но кайгырон нуналэ Ижкарын Ялан ӝуась тыл доры сяськаос понӥзы

Туннэ Быдӟым Атыкай ожын быремъёсты буре вайыны Ижкарысь Ялан ӝуась тыл дорын пӧртэм адямиос пумиськизы — интыосын ожъёсы пыриськем ветеранъёс, казакъёс, егитъёс. Митинге вуылӥзы Кун Кенешлэн Тӧроезлэн нырысетӥ воштӥсез, тазалыкез утёнъя, демографияя но семья политикая ялан ужась ӧрилэн кивалтӥсез Светлана Кривилева, элькун Кивалтэтлэсь Тӧроезлэсь ужзэ быдэсъясь Виктор Савельев, Тӧролэн но Кивалтэт администрацилэн кивалтӥсезлэсь ужзэ быдэсъясь Сергей Смирнов, Кун Кенешысь депутатъёс, мерлыко огазеяськонъёслэн кивалтӥсьёссы, Ижкарын улись калык. Соос ваньзы Ялан ӝуась тыл доры сяськаос понӥзы.
Тодэ вайытом, Буре ваён но кайгырон нунал Россиын пусйиське 1996-тӥ арысен. 22-тӥ инвожое фашистъёслэн войскооссы СССР-лэн интывылаз пыризы. Та нуналэ быдэс Россиын ваньмыз куншетъёс лэзисько, нош лулчеберетъя ужъюртъёслы, телеканалъёслы но радиостанциослы шулдыръяськон ужрадъёс но передачаос лэзёнлэсь возиськыны ӵектэмын.