Версия для слабовидящих
Электронной «тамакез» трос калыко интыосын кыскыны алозы

Электронной «тамакез» трос калыко интыосын кыскыны алозы

07.04.2017

Кун Кенешысь тазалыкез утёнъя, демография но семья политикая ялан ужась ӧриысь депутатъёс эскеризы электронной сигаретъёсты тамакен оградэ пуктон пумысен ужпумез.
Ӧриен кивалтӥсь Светлана Кривилёва ивортэмъя, таӵе законопроектэн Россиысь 5 улос Кун Думае вазиськылӥз ни. Соос радэ пырыны малпа Удмуртия но. Электронной сигаретъёсты Аргентинаын, Мексикаын, Сингапурын, Турциын, Тайландын но куд-ог мукет кунъёсын вузаны ик алэмын. Трос калыко интыосын кыскон сярысь веранэз ик ӧвӧл. Нош асьме дорын, вуззы ӟеч мед кошкоз шуыса, вузчиос сыӵе сигаретъёсты туж ушъяло, номыр кышкытэз ӧвӧл, шуо. Бен, тамакын сярысь, электроннояз тазалыклы изъян вайись элементъёсыз ичигес. Котьма ке но кема дыр ӵоже соин эшъяськон тазалык вылын шӧдӥськытэк уг кыльы. Озьы йыло ты, сюлэм висёнъёсын курадӟисьёс. Электрон сигаретлы дышемъёс отӥяз тамак вылэ выжо. Со сяна, электронной сигарет ӟырдамысьтыз пуштыны быгатэ. Сыӵе учыръёс берло дыре ӵемгес но ӵемгес пумиськыло. Нош поттэ сыӵе сигаретэз Китай гинэ.
Электронной сигарет, кальян, вейп котькуд сэргын сямен вузасько, Интернет вотэс пыр но сое басьтыны луэ. Озьыен, быдэ вуымтэ нылпиос но сое капчиен шедьтыны быгато. Нылпиослы вузаны, трос калыко интыосын кыскыны алон вылысь законопроект дасямын. Ӧрие пырисьёс солы ваньзы дурбасьтӥзы.


Возврат к списку