Светлана Кривилёва журналистъёсын пумиськиз

Кун Кенешысь Тазалыкез утёнъя, демографияя но семья политикая ялан ужась ӧрилэн кивалтӥсез Светлана Кривилёва журналистъёсын пумиськылӥз. Депутат кылем арлы йылпумъянъёс лэсьтӥз, туэлы чаклам ужпумъёс сярысь мадиз.
Кун Кенешлэн кылем арын ортчем сессиосаз эскеремын ялан ужась ӧриен дасям 7 законопроект. Туэ 1-тӥ толшорысен шаерамы огез улонэ пыӵаз ни. Гуртъёсын ужаны мылкыд карись 30 аресозь егит эмъясьёслы тыриськоз 500 сюрс манет. Депутат верамъя, нырысь ик санэ басьтозы хирургъёсты, фтизиатръёсты, анестезиологъёсты но мукет специалистъёсты. Быдэн 300 сюрс манет висъяськоз фельдшеръёслы но акушеръёслы. Ваньмызлы талы республикалэн казнаяз чакламын 36 миллион манет.
Вераз Светлана Кривилёва ялан ужась ӧриен ортчытэм мукет ужъёс сярысь но. Кылсярысь, ӧри сюлмаськемен, шаерамы тазалыкез утёнлы сӥзем 14 форум ортчытэмын. Врачъёс тужгес пыдлось гуртъёсы потазы, калыклэсь тазалыксэ эскеризы, дэмланъёс сётъязы, куд-огзэ висисьёсты Ижысь больницаосы ӧтизы. Та ужез азинтон понна туэ бюджетын висъямын 17,5 миллион манет. Со юрттоз диагностика ортчытонъя оборудование басьтыны, со тӥрлыкен ёросъёсы потаны.